Jesus taproestsleedje vu’ eend’

Aanhalings uit God se Woord. “1  Deese Woorden Jesus a spreek, en a lechtop si Oogen na die Hemel, en a see: Vader, die Uur ka kom; verheerlik Joe Soon, voor dat Joe Soon verheerlik Joe ookal. 2 Glik as Joe ka gie na Em Macht over allemaal Vleesch, dat Em gie die eewig Leev na sender allemaal, die Joe ka gie na Em. 3 En deese ben die eewig Leev, dat sender ken Joe, die Joe ben die eewige waarachtige God, en Jesus Christus, die Joe ka stier.” (Johannes 17:1-3 negerhollands) “6  Mi ka openbaar Joe Naam na die Menschen, die Joe ka gie na mi ut van die Werld. Sender a wees van Joe, en Joe ka gie sender na mi, en sender ka behou Joe Woord. 7 Noe sender weet, dat all wat Joe ka gie na mi, ben van Joe. 8 Want die Woorden, die Joe ka gie na mi, die mi ka gie na sender, en sender ka neem die aan, en ka erken waarachtig, dat mi ka loop ut van Joe, en sender gloof, dat Joe ka stier mi. 9 Mi bed voor sender, en mi no bed voor die Werld, maar voor sender, die Joe ka gie na mi; want sender ben van Joe. 10 En allemaal, wat ben van mi, die ben van Joe, en wat ben van Joe, die ben van mi; en mi ben verheerlikt nabinne sender.” (Johannes 17:6-10 negerhollands) “En mi no ben meer nabinne die Werld; maar sender ben nabinne die Werld, en mi kom na Joe. Heilige Vader, bewaar sender in Joe Naam, die Joe ka gie na mi, dat sender ben Em, glik as ons.” (Johannes 17:11 negerhollands) “15 Mi no bed, dat Joe sal neem sender wee van die Werld, maar dar Joe sal bewaar sender van die Quaat. 16 Sender no ben van die Werld, glik as ook mi no ben van die Werld. 17  Heilig sender in Joe Waarheid: Joe Woord ben die Waarheid. 18 Glik as Joe ka stier mi na die Werld, soo mi stier sender ook na die Werld.” (Johannes 17:15-18 negerhollands) “20  En mi no bed voor deese alleen, maar voor sender ookal, die door sender Woord sal gloof na mi; 21 Voor dat sender allemaal sal wees Em; glik as Joe Vader in mi, en mi in Joe, dat sender sal wees Em in ons ookal, voor dat die Werld kan gloof, dat Joe ka stier mi.” (Johannes 17:20-21 negerhollands) “22 En mi ka gie na sender die Heerlikheid, die Joe ka gie na mi, dat sender sal wees Een, glik as ons ben Een. 23 Mi nabinne sender, en Joe nabinne mi, voor dat sender sal wees vollkom in Een, en dat die Werld kan weet, dat Joe ka stier mi, en dat Joe hab sender lief, glik as Joe hab mi lief.” (Johannes 17:22-23 negerhollands) “25 Rechtveerdige Vader, die Werld no ken Joe; maar mi ken Joe, en deese ka erken, dat Joe ka stier mi. 26 En mi ka maak Joe Naam bekent na sender, en will maak die bekent; voor dat die Liefde, met die Joe hab mi lief, kan wees nabinne sender, en mi nabinne sender.” (Johannes 17:25-26 negerhollands)