Ushauri wa Paulo kwa umoja katika upendo – Eenheid in liefde

“1  Die Brief van Paulus na die Colossensen. Paulus, een Apostel van Jesus Christus, door die Will van God, en Timotheus, die Broeder; 2 Na die Heiligen in Colossen, en die gloofige Broeders in Christus. Gnade wees met jender, en Vrede van God, ons Vader, en die Heere Jesus Christus!” (Colossenzen 1:1-2 negerhollands) “7 Soo as jender ka leer ook van Epaphras, ons liefe Met-Dienaar, welk ben een getrouw Dienaar van Christus, voor jender. 8 Die ook ka see na ons van jender Liefde in die Geest. 9  Voordaarom ook van die Dag af, dat ons ka hoor die, ons no hou op, vor bed en vor begeer voor jender, dat jender kom vervoellt met die Kennis van si Will, in all geestlik Wiesheid en Verstand. 10 Dat jender kan wandel waerdiglik voor die Heere tot allemaal Welbehaagen, en wees vruchtbaar in allemaal goeje Werken; 11 En groey in die Kennis van God, en kom versterkt met allemaal Kracht, na si heerlik Macht, in allemaal Geduld en Langmoedigheid, met Bliskap; 12  En see Dank na die Vader, die ka maak ons bequaam tot die Erfdeel van die Heiligen in die Licht.” (Colossenzen 1:7-12 negerhollands) “20 En door Em a sal word versoent alle Dingen, tot Em selv, die ben op die Aarde, of nabinne die Hemel, met die, dat Em a maak Vrede door die Bloed van si Kroes, door Em selv. 21 En jender ookal a wees toevoorn Vremde en Vyanden; door jender Verstand in quaaje Werken;” (Colossenzen 1:20-21 negerhollands) “As anders jender bliev in die Gloof, gefondamenteerd en vast, en onbeweeglik van die Hoopning van die Evangelium, die jender ka hoor, en die ben gepredikt na allemaal Creatur, die ben na onder die Hemel; van welk mi, Paulus, ka word een Dienaar.” (Colossenzen 1:23 negerhollands) “Die ons verkondig, en vermaan elkeen Mensch, en leer elkeen Mensch in allemaal Wiesheid, dat ons kan stell elkeen Mensch vollkomen daar in Christus Jesus.” (Colossenzen 1:28 negerhollands) “2 Dat sender Hert a kan kom vermaant, en kom malkander in Liefde, en in allemaal Rikdom van die volle Verseekering van die Verstand, vor ken die Verborgenheid van God, en van die Vader, en van Christus. 3 In welk ben verborg allemaal Skatten van Wiesheid en van Kennis.” (Colossenzen 2:2-3 negerhollands) “6 Glik as jender ka neem noe aan die Heere Jesus Christus, soo wandel ook in Em; 7 En wees gewoltert en gebouwt in Em, en wees vast in die Gloof, glik as jender ben geleert, en wees in dieselvde overvloetig in Dankbaarheid.” (Colossenzen 2:6-7 negerhollands) “11 In welk jender ook ben besneden, met die Besnienis sonder Handen, door Aflegging van die sondige Lichaam in die Vleesch, naamelik, met die Besnienis van Christus. 12 Na die, dat jender ben begrafen met Em, door die Doop, in welk jender ka staan op ookal, door die Gloof, die God werk, die ka wek Em op van die Doojen.” (Colossenzen 2:11-12 negerhollands) “13  En ka maak ook jender leevendig met Em, toen jender a wees dood in Sondo, en in die Onbesnienis van jender Vleesch, en ka vergie jender allemaal Sondo. 14 En ka veeg ut die Handskrift, die a wees tegen ons, die a bestaan in Instellingen, en a wees tegen ons, en ka doe die ut die Meddel, en ka spiker die na die Kroes.” (Colossenzen 2:13-14 negerhollands) “1  As jender ka staan op noe met Christus, soo soek die Dingen, die ben naboven, waar Christus ben, die set na die rechter Hand van God. 2 Dink op na die Dingen, die ben naboven, en niet na die, die ben op die Aarde. 3 Want jender ka sterv, en jender Leev ben verborgen met Christus in God. 4 Maar wanneer Christus, ons Leev, sal kom openbaar, dan jender sal kom openbaar met Em ookal in Heerlikheid.” (Colossenzen 3:1-4 negerhollands) “5  Voordaarom maak dood jender Leden, die ben op die Aarde, naamelik: Hoererie, Onreinigheid, skandlik Beweegingen, quaaje Begeerlikheiden, en Gierigheid, welk ben Afgoden-Dienst. 6 Om die will van welke die Toorn van God kom over die Kinders van Ongloof; 7 In welk jender ookal ka wandel voortid, toen jender a leev nabinne dieselvde. 8  Maar noe jender lee af all deese Dingen, naamelik: Toorn, Gramskap, Boosheid, Lastering, skandlik Woorden ut jender Mond. 9 No lug onder malkander, derwil jender ka doe ut die oud Mensch, met si Werken; 10 En ka doe aan die nieuwe (Mensch), die word vernieuwt tot Kennis na die Evenbeeld van Em, die ka maak em; 11 Waar die no hab Griek en Jood, Besnienis en Onbesnienis, Barbar en Scytha, Dienst-Knecht en Vrie, maar alles en in allemaal ben Christus.” (Colossenzen 3:5-11 negerhollands) “12  Soo doe aan dan, as die Utverkiesen van God, Heilige en Geliefde, hertlik Barmhertigheid, Vriendlikheid, Demoedigheid, Sachtmoedigheid, Langmoedigheid. 13 En verdraag malkander, en vergie malkander, as die een hab Klaagte tegen die ander: glik as Christus ka vergie jender, soo jender doe ookal. 14 Maar boven deese allemaal doe aan die Liefde, welk ben die Band van Vollkomenheid.” (Colossenzen 3:12-14 negerhollands) “15 En die Vrede van God regeer nabinne jender Hert, na welk jender ook ben geroepen in een Lichaam, en wees dankbaar. 16 Lat die Woord van Christus woon riklik onder jender in allemaal Wiesheid, leer en vermaan malkander selv met Psalmen en Loofsangen, en geestlik Liederen, en sing met Aangenaamheid voor die Heere nabinne jender Hert. 17 En allemaal, wat jender doe, met Woorden of met Werken, doe die allemaal in die Naam van die Heere Jesus, en dank God en die Vader door Em.” (Colossenzen 3:15-17 negerhollands) “23 En allemaal, wat jender doe, doe die van jender Hert, as voor die Heere; en niet voor die Menschen. 24 En weet, dat jender sal ontvang van die Heere die Vergelding van die Erfdeel; want jender dien die Heere Christus.” (Colossenzen 3:23-24 negerhollands) “2  Hou aan in die Gebed, en wach na dieselvde met Danksegging. 3 En bed met een voor ons ookal, dat God will open die Door van die Woord voor ons, vor spreek die Verborgenheid van Christus, voor die mi ben gebonden ookal. 4 Voor dat mi kan openbaar die, glik as die betaam mi vor spreek.” (Colossenzen 4:2-4 negerhollands) “Jender Woorden sal wees altid aangenaam en bespringelt met Sout, dat jender kan weet, hoesoo jender sal antwoord na elkeen.” (Colossenzen 4:6 negerhollands)